中華民國106年全國語文競賽 【國小學生組】
我上佮意的𨑨迌物仔
作者：蔡永豐
各位評審老師，各位同學逐家好，我是第○號參賽者。
我欲講的題目是：我上佮意的𨑨迌物仔。
若講著上佮意的𨑨迌物仔，相信誠濟人一定是講耍手機仔。無毋著，這應該是現代人共同的語言。毋過我家己感覺我好親像是古早人，因為我愛耍的𨑨迌物仔攏是自古早流傳到今的物件，尤其上佮意的就是「扯鈴」，聽講這項物件上起碼嘛有1500冬以上的歷史矣！
「扯鈴」佇古早時代的名真濟種，比如講叫「空竹」、「空鐘」、「響鈴」等等。我是較慣勢叫搝空竹，就是因為這个名予我感覺真好奇，毋才致使變成是我上佮意的𨑨迌物仔。
自細漢我就真愛家己做𨑨迌物仔來耍，人講：「家己種一欉，較贏看別人」。會記得讀2年的時陣，聽臺語老師講「扯鈴」這个物件古早是用竹仔做的，聽著按呢，我就拜託爸爸共我鬥款竹仔材料予我家己來試做看覓。毋過人講：看安公仔食雞腱脆脆，家己無一定食會好勢。有影無我想的遐爾簡單，所以第一擺的作品差不多攏是爸爸替我完成的。雖然拄開始是按呢，毋過後來我的自製率愈來愈懸，最後達到百分之百純家己製造。我做的空竹毋但實用，品質嘛愈做愈幼膩，尤其我閣發現著愛按怎開孔搝起來才會訶(honn)甲足大聲，知影這个鋩角了後我就愈做愈趣味。
自從學會曉做空竹了後，我就開始學按怎搝空竹，搝空竹的花步有真濟種，比如講：狗蟻上樹、田嬰點水、金蟬脫殼以及大鵬展翅等等。每種的花步攏有伊好耍好看的所在，其中我上愛耍的就是狗蟻上樹佮大鵬展翅。狗蟻上樹好耍的所在就是會當予空竹歇佇頂懸徛牢咧來吸引別人的目睭；啊若大鵬展翅上好耍的所在就是空竹對索仔下跤起來頂懸的時，空竹離開索仔就親像大鵬鳥展翅欲起飛，實在有夠好耍。
這幾年來我學會曉做空竹佮搝幾若種花步，予我上大的體會就是人所講的：種啥物因，得啥物果。因為無論是學做空竹抑是學搝空竹的步數，攏毋是凊彩學就會曉，逐步攏愛下真濟時間佮工夫去學習才法度成功。這嘛和咱做代誌佮讀冊的道理仝款，也因為有這層的意義，所以搝空竹就成做我上佮意的𨑨迌物仔。
我的演講就講到遮，感謝逐家。
