中華民國108年全國語文競賽 【國中學生組】
我若是會曉飛
作者：蔡永豐
各位評判老師，各位同學，逐家好，我是第□號參賽者。
我欲講的題目是：「我若是會曉飛」。
我若是會曉飛，我第一个想著的就是欲做守護臺灣的環保『小飛俠』。我會一面飛一面用上近距離的方式翕咱臺灣，若技術允准的話，我會隨時開『網路直播』，我毋是想欲做『網紅』，我是欲予逐家隨時攏看會著咱臺灣的美麗佮哀愁。
講著遮，我想講我若會曉飛，相信佇2017年6月初10就袂發生『齊柏林』導演為著欲翕「看見臺灣」，煞來發生墜機的遺憾事件。這層代誌到這馬我的心肝頭猶原嘛猶足酸的。因為按呢，所以我若會曉飛，我會完成『齊柏林』導演的向望，閣共「看見臺灣」進化到2.0版。我會飛去翕一般人無法度看著的所在。
咱臺灣是一个美麗的寶島，這是世界所公認的事實，雖然面積干焦36,000平方公里，毋過伊超過3,000公尺以上的高山就有200外粒，而且伊的四箍輾轉閣攏是海，就因為這款地理關係，所以有真特殊的地形佮地質，嘛有千百萬種的動物佮植物佇這塊島嶼咧生存。因為有遮濟優良的自然條件，所以才有「Formosa」這个稱號，這是北回歸線所經過二十幾个國家中獨一無二的。
人講：世境真好毋知寶，日來惹業毋知錯。確實，咱臺灣雖然自然環境好，毋過為著欲發展經濟，煞無顧著一切，一直共迫害咧。尤其最近這幾十冬來，佇咱生活的每一寸土地，無一塊是淨土，咱所呼吸的空氣嘛足歹欶著清新的，山頂的大欉樹仔無去矣，拄著落雨塗就流對平地落來，造成嚴重的水崩山，閣有就是清清的溪仔水，嘛予工場排出來的廢水變成是濁稠稠、烏漉漉的汙水。
Annh～，看著咱臺灣的美麗佮哀愁，我若會曉飛，我一定欲飛去足懸足懸的山頂，翕遐的上媠上媠的景色，我嘛欲予逐家看著高山頂懸一冬四季綴著氣候變化咧變面佮變裝。猶嘛欲飛去玉山佮大武山走揣逐家認定已經絕種的臺灣雲豹，猶佮一寡雖然猶未完全消失，毋過嘛差不多攏無塊看著的臺灣稀罕動物。
上重要的猶是愛盡著守護臺灣環保『小飛俠』的責任，我無時不刻攏會四界飛來飛去通好監督遐的咧迫害臺灣環境的兇手，比如講山老鼠啦、工場偷排汙水抑是土地胡亂挖的人等等，我攏會隨飛去共伊翕起來，予伊無法度逃避責任。總講一句，我若是會曉飛，毋知偌好咧！
我的演說就講到遮，多謝逐家！
