我上期待的日子

中華民國108年全國語文競賽 【國中學生組】

我上期待的日子

作者：蔡永豐

    各位評判老師，各位同學，逐家好，我是第□號參賽者。

    我欲講的題目是：「我上期待的日子」。

    講著「我上期待的日子」，正正就是今仔日啦。因為我已經足足等一冬矣！這是按怎講呢？會記得舊年的這个時陣，仝款這个情境，仝款嘛是我代表學校來參加這場閩南語演說比賽。因為事前準備不足閣加上上場經驗無夠，所以佇台頂是講甲離離落落閣兼淡薄仔忘詞，落台了後我就知影這聲穩是賣豆花車倒碗盤仔講去(缺)了了矣。想起著彼當陣的心情，講有偌䆀就有偌䆀。

    不而過猶算好佳哉，我隨想著講無要緊，明年猶閣有一擺的機會咧。人講：「失敗為成功之母」，所以我就下定決心，無論如何明年的閩南語演說比賽，我一定欲拚第一名，然後代表全縣參加全國的決賽。所以講今仔日就是我一冬來記心記意、暝日所期待的日子，我再度閣徛佇台頂參加演說比賽囉！

    這一冬來，為著欲東山再起，我就先擬定一个「復仇者A計畫」，決心欲『臥薪嘗膽』來面對這場「九月之約」。話雖然是按呢講，毋過一冬的時間嘛無算短，我恐驚～無法度堅持到底，到時煞虎頭鳥鼠尾。為著欲克服這个難題，我想盡辦法，拜託我的爸母、老師、朋友、同學做伙共我督促、鞭策，予我袂使有放鬆的機會。

    紲落來，我就按照計畫開始進行，頭先就針對舊年比賽的時所犯的缺點一項一項做檢討佮改進。第一、我正式體會出演說的本質就是一種表演講話的藝術。所以講競賽的條件除了愛有好的內容以外，當然愛比伊的發音、語調佮語氣，閣來就是臺風嘛足要緊。

    經過一一檢討了後，我就開始對症落藥。代先要求發音，也就是聲韻調一定愛正確，干焦這部分我就食了袂少苦湯，閣來就是訓練欲按怎控制語調懸低起落的鋩角，佮講話的速度、音量大細等等。閣有就是臺風的訓練，毋管是表情、動作抑是手勢，我嘛攏下真大的功夫。毋爾按呢，俗語講：「他山之石，可以攻錯。」所以我嘛定定參考別人演說的優點來做家己缺點的改進。另外就是如何克服上台會緊張佮忘詞的原因，我嘛收集真濟資料認真咧做練習。

    經過這一冬來嚴格的訓練，人講：「有心拍石，石成穿」。我上期待的日子，嘛是我欲踮台頂好好表現的時陣已經到囉！相信皇天一定袂辜負苦心人。

    我的演說就講到遮，多謝逐家！