上趣味的一節課

臺語演講稿：上趣味的一節課 作者：蔡永豐
中華民國101年全國語文競賽 臺灣閩南語演說題目(國小學生組)
蔡永豐
各位評判先生、各位同學，逐家好。我是第□號，我欲講的題目是：「上趣味的一節課」。
若講到上趣味的一節課，就是這學期阮班換一个新的臺語老師，伊來阮班上第一節課，就講咱先來用臺語點名，1號李良光。老師講：「喔！你有夠大，逐家攏愛叫你阿公。」全班攏笑甲攬腹肚。7號林彥祖，老師閣講：「喔！你閣較大，逐家攏愛叫你阿祖，連恁阿公嘛愛叫你阿祖。」全班猶閣笑甲歪膏揤斜。閣落來嘛有阿姨啦、阿姑啦。就按呢，對頭點到尾，全班嘛攏對頭笑到尾。頭一擺聽到臺語名實在真心適。
紲落來，老師講：「咱後擺上課一節40分鐘會分做二階段，頭一階段30分鐘上課本的物件，第二階段10分鐘上課外的物件。」阿光隨攑手問講：「老師，課外有啥物物件。」老師講：「臺語課外的物件包山包海，親像講臺灣俗語、激骨仔話、臆謎猜、講故事、囡仔歌猶閣有盤喙錦、講笑詼等等，真濟真濟的物件。」阿瑄就攑手講：「老師你先講故事予阮聽。」老師講：「閣存無幾分鐘就下課矣！我先講一个足短閣足無聊的故事。古早古早，山頂有蹛一个老和尚佮一个小和尚，老和尚逐日攏講故事予小和尚聽。老和尚攏共小和尚講古早古早，山頂有蹛一个老和尚佮一个小和尚，老和尚逐日攏講故事予小和尚聽。老和尚攏共小和尚講……」，全班就攏接落去講：「古早古早，山頂有蹛一个老和尚佮一个小和尚……」，了後全班就笑甲東倒西歪。雄雄阿祖攑手問講：「老師啥物叫盤喙錦？」老師講：「這咱後日矣會教到，我先唸一篇予恁聽。鼓破用布補，布破用鼓補，毋知鼓補布，抑是布補鼓。」逐家攏聽甲花膏膏，嘛攏唸甲離離落落，舌攏拍結，毋過嘛真趣味。
逐家舌攏抑閣咧拍結的時陣，阿光閣攑手講：「老師閣講一个故事。」老師講：「好，我換來講一个歹聽、無好笑的故事。」老師講歹聽、無好笑其實是足好聽閣足好笑矣。老師愈講愈精彩，我一直看頭前的時鐘，剩45秒就下課矣，故事一定講袂了，正當講到上精彩的所在，啊！下課的鐘仔霆落去矣！全班一直喝講：「老師，莫下課，莫下課，繼續講！」毋過老師講一句：「後禮拜即閣講。」逐家攏「諾 (hànn)」一聲。實在是上趣味的一節課，嘛是全班攏上期待「後禮拜即閣講」的臺語課。
我的演講就講到遮，多謝大家！

我上快樂的代誌

臺語演講稿：我上快樂的代誌 作者：蔡永豐
中華民國100年全國語文競賽 臺灣閩南語演說題目(國小學生組)
各位評審老師，各位同學大家好，我是○號，我欲講的題目是「上快樂的代誌」。
下早仔睏起來了後，爸爸講：「昨暝阿公敲電話來叫咱轉去鬥採收龍眼。」逐冬的歇熱，我上期待，嘛是上快樂的代誌就是轉去阿公阿嬤遐採收龍眼。
早頓食飽了後，爸爸就開車載我佮媽媽和妹妹作伙轉去阿公阿嬤遐。到位了後，阿公講：「趁下早較涼，趕緊先來採收。」逐擺採收龍眼，阮攏有固定的工課，我負責先試食，因為每一椏攏愛先試食一粒看莫，通過了後，阿公才將彼椏鉸落來，了後爸爸就負責共下落去籠仔內底，一籠一籠才拖去予阿嬤佮媽媽將葉仔佮樹椏仔修予清氣，干焦妹妹閒閒無代誌。
阿公雖然有種十外欉的龍眼，毋過攏毋是咧賣，攏是咧送人的。所以阿公就將採收起來遐的龍眼分作二部份，一部分是欲予爸爸載轉去送予伊的同事佮朋友；另外一部分阿公就下起伊彼台發財仔車，準備欲送去予三个姑婆佮二个叔公。
食中晝飽了後，阿公招我作伙去送龍眼。佇路裡，我看到有一个人佇田裡駛一台誠大台的鐵牛仔，鐵牛仔的後壁面綴差不多有規百隻的白鷺鷥。我感覺真奇怪，鐵牛仔犁田的聲音轟啷轟啷遐大聲，白鷺鷥哪攏毋驚，敢講白鷺鷥的耳孔是臭耳儂？忽然間，有一聲炮聲，遐的白鷺鷥攏隨飛起來。我問阿公講這是按怎？阿公講：「白鷺鷥綴置鐵牛仔的後面是咧揣物件食，駛鐵牛的人袂傷害，所以毋驚，毋過聽著炮聲，白鷺鷥知影可能是欲傷害，所以就會敢緊飛走。」原來是按呢，我今仔日擱加別一項矣。
無偌久龍眼就攏送了矣。到返來了後，阿嬤就隨喝講：「咱有收成，所以逐家攏來去龍眼仔跤拜拜。這叫做食果子拜樹頭，食米飯敬鋤頭。」原來阿嬤常在講咱人愛感恩、知恩，我這馬才進一步體會伊的意思。
食暗頓了後阮就到返來，佇路裡我開始想：「過年彼陣看到龍眼欉拄咧『吐紅』，阿公講：『今年熱人應該有龍眼通食。』清明節轉去的時陣，逐欉龍眼攏開花開甲足媠的。五日節擱轉去的時陣，就看到結細粒仔子，阿公共我講：『差不多擱二個月就會當採收。』對彼的時陣我就開始期待歇熱的採收龍眼。」
今仔日對龍眼的期待到正式採收，採收的時閣全家總動員作伙做工課，紲落去，閣會當加別一寡知識，這就是我上快樂的代誌。
我的演講就講到這，多謝大家！