我上佮意的禮物

中華民國105年全國語文競賽 【國小學生組】

我上佮意的禮物

作者：蔡永豐

各位評審老師、各位參賽的同學逐家好！我是第□號，我欲講的題目是「我上佮意的禮物」。

    若講著我上佮意的禮物，從細漢到今已經是歹算矣！毋過隨著年紀的變化，上佮意的禮物嘛一直咧變化。閣再講，上佮意的物件無一定是真正攏實用的，有時會成人，有時嘛會害人。所以人講：玫瑰媠是媠，毋過全全刺。

    話講起佇我五年的時，彼陣心內上期待、上佮意得到的禮物是一台平板電腦。我雖然無講出喙，毋過厝裡的人，包括阿公、阿媽、爸爸佮媽媽攏看會出來，所以有一工食暗頓的時，阿公先開喙問我講：「這擺月考敢有信心逐科攏考滿分？」我講：「應該無問題」，阿公隨閣講：「若逐科攏滿分，送你一台平板電腦。」爸爸嘛綴咧贊聲講：「我請你去『麥當勞』。」聽著阿公欲送一台平板電腦，閣有通去『麥當勞』推甲飽，所以考試的進前我逐日攏足認真，最後真正「皇天不負苦心人」，四科攏考滿分。成績分落來彼暝，阿公就隨講：「行，隨來去買平板電腦。」阿媽講：「敢一定愛遐趕緊，加一站仔才買敢袂使？」阿公講：「男子漢大丈夫，一言說出駟馬難追。」我嘛綴咧講：「hē-mē」。就按呢，彼暝毋若有平板電腦，閣去『麥當勞』食甲飽tu-tu。

    自從有這份禮物了後，逐日下課轉來到厝，耍平板電腦是我第一要緊的代誌，寫功課攏是凊彩應付應付，到第二次月考欲到的時，我的心嘛是猶閣放蕩放蕩欸。到第二次月考的成績分落來，我佇班上排十外~外名，逐科的分數攏足歹看，這聲賣豆花車倒碗盤仔－去了了。彼暝食暗頓的時，厝內的人攏若像對天堂摔落去地獄，面腔攏足歹看。阿公先開喙講：「這擺考試你考了無好，我仝款欲送你一份禮物。」我心內想講這份禮物穩是箠仔枝炒肉絲食到飽。毋過阿公隨綴咧講：「勝敗是兵家常事。花無百日紅，人無千日好。」阿媽嘛接落去講：「仙人拍鼓有時錯，跤步踏差啥人無。較早你爸爸嘛捌按呢，毋過伊隨知影按怎檢討改進。」這个時陣爸爸佮媽媽攏對我的肩胛頭輕輕仔罩罩咧。我的心肝頭突然間感覺一直溫暖起來，我已經知影我的問題欲按怎改進囉！

    自從經過這擺的代誌了後，我深深體會出我真真正正上佮意的禮物是愛心佮鼓勵。

    我的演講就講到遮，多謝逐家！

若準我是老師

中華民國105年全國語文競賽 【國小學生組】

若準我是老師

作者：蔡永豐

各位評審老師、各位參賽的同學逐家好！我是第□號，我欲講的題目是「若準我是老師」。

    佇我小學1、2年的時，我就一直有一个夢，以後大漢我欲做老師，雖然這个夢凡勢仔無法度實現，毋過到這馬我攏無改變，而且愈來愈堅定，所以嘛常在咧想講若準我是老師，我欲按怎做一个好老師。

    代先，我會傾聽每一个學生的心聲佮問題。會記得4年的時有一擺月考，我數學考甲足䆀矣！返去媽媽無先問我是啥物原因就一直罵，罵甲我嘛足受氣矣。隔轉工去學校，老師叫我去，伊毋但無罵我，閣輕聲細說問我講這擺月考是啥物原因哪會考按呢？我共老師講：「考試彼工，我行路來學校的時，可能是咧想考試的代誌，所以無注意後壁一台車，伊煞雄雄共我pann一聲足大聲，害我驚一趒，紲落去我就頭楞楞，連行路嘛加足無力欸！所以第一節考數學的時陣規个人攏楞神楞神，題目攏想袂出來。」老師聽了隨問我講曷這馬感覺按怎？我講：「嘛猶閣小可仔怪怪。」老師閣問我講：「媽媽敢知影這層代誌？」我共老師講：「我無共厝裡的人講。」老師聽了就隨敲電話予媽媽，閣建議媽媽講愛𤆬我去收驚。雖然這無一定是足大的代誌，毋過因為按呢，以後媽媽嘛改變對我教示的方法。

    紲落來，我會發揮創意教學的精神。創意教學對每一个科目攏真實用，我就舉本土語言這科來講。比如講我咧上閩南語課的時，老師攏用講故事來吸引阮的學習，了後，閣對故事的內容去套一句俗語抑是激骨仔話，予阮對閩南語一步一步愈來愈有趣味。毋但按呢，老師上課嘛常在設計一个主題，比如講果子、蔬菜、動物等等，予阮分組比賽一項一項果子一直接落去。逐家為著輸人毋輸陣，輸陣歹看面，所以老師若講後禮拜欲拚佗一項，逐組就攏真拚勢揣資料練習，就按呢無形中逐家閩南語的功力嘛愈來愈好。這就是創意教學的功能，若準我是老師我會更加閣較創新佮精進，予每一个學生對每一个科目攏會當佇心適、趣味中來學習。

    講起來欲做一个好老師一定愛十八般武藝齊齊全。無但緊，嘛愛有耐心、愛心佮熱心。所以趁我猶未是一个真正的老師進前，我就愛好好學習、思考如何教好咱未來的學生。

    我的演講就講到遮，多謝逐家！

一擺練習的機會

中華民國105年全國語文競賽 【國小學生組】

一擺練習的機會

作者：蔡永豐

各位評審老師、各位參賽的同學逐家好！我是第□號，我欲講的題目是「一擺練習的機會」。

    若講著一擺練習的機會，相信每一个人攏一定有拄著，比如講月考進前的平常考練習，抑是欲參加各種比賽進前的練習。毋過每一个人對練習的機會無一定共款，有人真珍惜練習的機會，有人就無共伊當作是啥物，所以伊的結果一定就無共款。

    會記得4年的時，有一工老師雄雄指定我代表阮班參加學校閩南語演講比賽，我共老師講我的臺語無甲外袂輾，敢會使機會讓予別人，老師鼓勵我講無要緊，這是一擺練習的機會，我感覺真有道理，因為對我來講這是一个難得的機會，所以我就報名參加。比賽進前我開始認真背演講稿，老師嘛指導我真濟閩南語演講比賽的要領，伊講演講比賽上重要的就是愛知影演講的內容是啥物，袂使干焦背稿爾爾，因為彼才是演講的靈魂。若無，徛佇台仔頂就親像一个有體無魂的稻草人。聽老師提醒了後，我若有內容無啥了解的所在，我返去就會問阿公。紲落去，我要求厝裡的人先做我的觀眾兼評審，而且逐家攏愛講評。了後，我閣拜託老師佮同學嘛共款做我的觀眾兼評審。就按呢一擺閣一擺一直認真練習，漸漸我對家己嘛愈來愈有信心，想講無論如何我一定袂使落氣。

    到比賽彼一天，好佳哉我抽到尾二號上台，按呢我就有時間通好觀察別人的表現。看起來有的同學講了袂䆀，有的同學若像足緊張干焦一直咧背稿爾爾，嘛有的同學上台講無二句就若像鎮殿將軍，恬恬徛咧講袂出來，啊！一定是忘詞。接咧閣來就著我，我一直提醒家己，愛保持平常心，嘛想著阿公定定咧講的一句話：「驚驚袂著等。」所以上台了後，我信心十足，一直保持像平常練習的表現。最後成績公布，我真正無落氣，提著第一名。

    俗語講：「台頂三分鐘，台跤十年功(king)。」機會是留予用心的人。親像彼擺的演講比賽，我就是聽老師所講的把握一擺練習的機會，認真拍拚毋才有好成績。若無的話，相信上台一定會講甲離離落落，凡勢佇台頂就袂記得演講詞。若按呢，我今仔日就無機會通好代表阮學校來參加這場比賽。

    我的演講就講到遮，多謝逐家！