中華民國107年全國語文競賽 【國小學生組】
作者：蔡永豐
〈拄著困難的時陣〉
各位評判老師，各位同學，逐家好，我是第□號。我欲講的題目是：「拄著困難的時陣」。
人講：「人生不如意的事十有八九。」毋過，有時仔圓人會扁扁人會圓、有時星光有時月光。所以拄著困難的時陣就看咱用啥物態度去看待。俗語講：「一樣米飼百樣人，逐家攏總袂相仝。」有人拄著困難的時是勇敢面對，共食苦當做食補。有人是抱著田螺含水過冬的精神－忍耐等候時機。當然嘛有人拄著困難的時是選擇勼跤放棄，毋願揣出解決代誌的計智，干焦規日攏是怨天怨地怨老母佮老爸怨鱟桸佮飯篱。當然，親像這款人就是「仙丹妙藥嘛難救無命客」。
拄著困難的時陣，對我來講，是常常的代誌。毋過，阿母定定攏會共阮講一句話：「天下無難事，只驚有心人。」所以我攏會時常記佇心內。就以這擺參加演說比賽來講，真正是咧考驗我拄著困難的時陣是用啥物款的態度去應付。
話講起舊年的時陣，學校舉辦國語文競賽，規定每一項目逐班攏愛派一个代表參加，阮班干焦閩南語演說攏無人欲參加，最後老師就指定我參加。彼時陣我干焦會曉講一寡簡單的閩南語爾爾，叫我參加演說比賽，論實力真正猶是一丈差九尺。寢頭仔我嘛無知欲按怎？好佳哉，老師知影我的情形了後，隨鼓勵我講：拄著困難的時陣，心頭掠予定，毋免驚，認真拍拚，勇敢向前行。我閣想著講這和阿母定定咧鼓勵阮的話嘛差不多。所以我就下定決心，無論有偌爾困難一定欲克服，目標是會當提著全校比賽第一名。
就按呢，我開始和老師參詳，阮作伙排定一套「演說作戰A計畫」。也就是對臺語的聲韻調開始訓練起，尤其是聲調的懸低起落欲按怎控制，以及講話的速度、音量大細等等。紲落來，就開始訓練臺風，包含表情、動作、手勢。經過這段嚴格訓練了後，俗語講：「有心拍石，石成穿」、「皇天不負苦心人」。我真正得著全校第一名，而且閣代表阮學校來參加咱全市的比賽。
這就是我拄著困難的時陣勇敢面對，共食苦當做食補所得著的成果。毋才有今仔日這个機會徛佇遮和逐家作伙分享我的過程。
我的演說就講到遮，多謝逐家！
