中華民國104年全國語文競賽
【國小學生組】
我的心內話
作者：蔡永豐
各位評判老師，各位同學，逐家好，我是第□號。
我欲講的題目是：「我的心內話」
會記得三年的時陣，哥哥代表學校參加嘉義市閩南語演講比賽著第一名，爸爸佮媽媽歡喜甲請阮去『麥當勞』，彼陣我心內著開始想講有一工，我嘛欲和哥哥共款，會當得到閩南語演講比賽第一名。
毋過彼時陣的我，干焦會曉聽三二句仔簡單的閩南語爾爾，欲叫我講閩南語，彼(he)是阿婆仔生囝講誠拚咧。雖然是按呢，毋過我心內已經開始下定決心，一定愛學會曉閩南語。
欲學閩南語，頭先愛學會曉聽佮講。所以我就拜託媽媽去買一寡閩南語童謠的CD予我聽，聽了感覺嘛袂偌歹學，所以誠緊我就對學閩南語有信心矣。紲落來，我準備用閩南語和人講話。第一个當然是和哥哥講看覓，我一開喙就隨予哥哥笑講：毋若話講袂輾轉，連音嘛攏無標準。因為我共哥哥講：我(uá)有聽臺語(í)囡(in)仔歌的CD。哥哥講應該愛講：我(guá)有聽臺語(gí)囡(gín)仔歌的CD才對。原來閩南語的聲韻調是愛有鋩角的，尤其是變調的部分。哥哥看會出我想欲參加臺語演講比賽，所以伊共我講：想欲參加臺語演講比賽，若無三五冬的工夫是無法度著等的，因為毋是干焦會曉講臺語爾爾，台風嘛愛在。
寢頭仔開始學講的時，有影拄著真濟困難，毋過人講：「有心拍石，石成穿」。閣再講，拚閩南語演講比賽第一名是我講袂出喙的心內話。所以我佇學校上臺語課的時攏特別認真，嘛常在和 老師討論一寡參加演講比賽的代誌，老師嘛鼓勵我盡量爭取代表班級參加比賽。就按呢，舊年我代表阮班上去參加學校的比賽，比賽了後評判 老師講評的時講著我的缺點完全喬哥哥講的攏共款，我想這聲穩是賣豆花車倒碗盤講去(缺)了了。成績公佈我得著第四名，當然無緣代表學校出去參加比賽。
俗語講：「失敗為成功之母」。佇這一年來我認真苦練，常在利用禮拜日去菜市仔聽賣菜的「阿桑」和人客買賣的時咧講的傳統臺語，有時仔嘛會去廟口聽老阿公仔講話。經過這一年的訓練，老師呵咾我講臺語進步了真緊，嘛鼓勵我今年繼續閣爭取參加比賽，因為有舊年失敗的經驗，所以這擺心內有一種講袂出來的驚惶，毋過想欲拚著嘉義市閩南語演講比賽第一名正是我講袂出喙的心內話。
我的演講就講到遮，多謝逐家！
