我上愛唱的囡仔歌

中華民國104年全國語文競賽 臺灣閩南語演說稿 (國小學生組)

我上愛唱的囡仔歌  作者：蔡永豐
各位評判老師，各位同學，逐家好，我是第□號。
我欲講的題目是：「我上愛唱的囡仔歌」    
        佇我四年的時陣，閩南語老師教阮一首伊家己創作的囡仔歌，號做：「咱嘉義的出產物」。伊是按呢唱的：
欲食好食物    就來阮嘉義    番路有甜柿    布袋虱目魚
大埔出筍絲    太保甜玉米    水上有蓮子    溪口柑仔蜜
東石食沙西米搵阿里山的哇沙米新港新港飴    好食袂夾齒
民雄的王梨    熱人正著時    害我若想起    喙涎潺潺滴
梅山的茶米    全國第一枝    竹崎出名是    龍眼佮荔枝
朴子的魚丸    好食佇舊市    鹿草破布子    早頓好料理
中埔的木耳    食了會開脾    義竹蓬萊米    會使做壽司
六腳的塗豆    閣加蒜頭味    愈食愈紲喙    食少無夠氣
大林的蜂蜜    有食有行氣    食了會予恁    媠甲若西施
嘉義雞肉飯    別位無底比    逐家來嘉義    食甲笑咪咪    
我第一擺聽著這首囡仔歌的時，感覺足好聽的。老師解說講伊是五字一句，閣有押韻的囡仔歌。莫怪我愈唸愈順喙。
    彼日放學了後，我轉去到厝就隨唸予阿公佮阿媽聽。阿媽隨呵咾講好聽閣袂跳針。阿公嘛講這首囡仔歌真有意思，凡勢恁爸爸佮媽媽嘛無一定攏知影遐个所在。
    食暗頓的時，阿公叫我閣唸一遍，媽媽講足好聽的，毋過真濟所在伊攏毋捌聽過；爸爸嘛講有的所在雖然知影，毋過毋知影遐有出產啥物。阿公就講這我來講予你聽上合，因為我少年時代無論是上山、落海抑是平原攏走透透，一台「oo-too-bai」托規嘉義。
    阿公那講那解說，我愈聽愈心適，有時仔阿公閣會講著彼的所在別項出名的物件，比如講東石的蚵仔嘛足出名；有時仔阿媽嘛會插喙綴咧講，比如講竹崎的柑仔、柳丁，民雄的鵝肉嘛攏足出名。有時仔阿公佮阿媽為著一个所在佗一項名產較出名就一直相諍，比如講，阿公講梅山的茶米確實是現此時上衝的名產，毋過阿媽就講梅山上衝的是梅仔，毋是茶米。雖然二个有無共款的看法咧相諍，毋過嘛顛倒予阮加知影彼个所在毋若干焦彼項名產爾爾。食飯飽了後，阿公講：「親耳聽較輸親目見」。規去對後禮拜開始，我駛車載恁三个媽孫仔來去逐鄉鎮做「巡迴鼻香之旅」，予恁親身體驗當地土產的滋味。
    老師創作的這首囝仔歌予我和弟弟會當享受各地的名產，閣予我認捌咱在地的媠，嘛閣增加本土文化的智識，真是一兼二顧，摸蛤仔兼洗褲。也嘛成作我上愛唱的囝仔歌。    我的演講就講到遮，多謝逐家！