我上愛食的果子
作者：蔡永豐
各位評判老師，各位同學，逐家好，我是第□號參賽者。
我欲講的題目是：「我上愛食的果子」。
若講著我上愛食的果子，就是阮兜家己種的荔枝啦！連這馬雖然徛佇台頂參加演說比賽，毋過若想起著阮兜的荔枝毋爾肉濟汁甜，閣有淡薄仔酸甘甜仔酸甘甜的滋味，我喙瀾就強強欲津落來。
咱臺灣是世界公認的「水果王國」，果子一年四季攏嘛滿滿是。若按呢，是按怎我哪會上愛食阮兜家己種的荔枝呢？這我就對頭來講起。阮兜有種6欉荔枝，攏是種欲家己食的，伊的品種號做「糯米糍」，這款品種無偌大粒，外皮小可青紅青紅，食起來是甜中帶著淡薄仔酸氣。
逐冬若到五日節墘，荔枝好收成的時，阮兜規家大細就攏歡歡喜喜咧採收荔枝。6欉做伙收成，家己攏嘛食袂去，所以攏會分送予親情五十佮厝邊頭尾。逐家都攏呵咾阮兜的荔枝足好食，佇菜市仔攏無塊買遮爾仔好食的荔枝。
荔枝會好食當然是愛經過一段苦心栽培的過程。若講著照顧荔枝欉，阮兜的人就是阿公佮我上用心。無論是落肥、沃水、治蟲害等等，攏是我配合阿公咧管理。講著落肥，阿公攏堅持一定使用伊家己製造的有機肥水，也就是用青菜葉仔、果子皮落去製造予伊自然發酵。猶若治蟲害阿公嘛堅持一定袂使噴化學農藥，伊攏用自然農藥來防治病蟲害，也就是使用無污染的植物性殺蟲劑，比如講像苦茶粕、樟腦油、蒜精等等。阿公定定講：「家己種一欉，較贏看別人。」我頭先攏干焦了解字面上的意思爾爾，後來漸漸才體會出較深層的意義，也就是講只有家己種的咱才有法度堅持用有機的農作法，若買別人的，咱就毋知影是按怎作法。所以有遮个原因，我才敢大聲講：我上愛食的果子，就是阮兜種的荔枝。
往過阮兜的荔枝欉會記得佇過年後至清明節前，荔枝花攏會開甲規欉滿滿是，有夠媠的。毋過今年已經過清明節矣，攏無開半蕊花。阿公講：舊年雨水無正常，今年氣候閣拄著「暖冬現象」，清明過荔枝若開始「吐紅」就袂開花結果矣！哇～賣碗盤的車倒擔講去(缺)了了。人講：「天有不測風雲」。這馬我才深深體會「人飼人一支骨，天飼人肥朒朒」這句話的道理。只好祈求天公祖仔庇佑風調雨順，予我年年攏有通食著我上愛食的果子。
我的演說就講到遮，多謝逐家！
沒有留言:
張貼留言